Zinema-jaialdiek, hasiera-hasieratik, nazioartean posizionatzeko modua landu dute, publizitate- eta informazio-materialak kanpoan banatzearen bidez. Urteetan, beste jaialdi batzuekin katalogoak trukatzearen arrazoiak merkataritza- eta diplomazia-interesak izan dira. Hala ere, batzuetan, ezagutzak transmititzeko eta elkarlan-sareak osatzeko tresna bat ere izan dira.

Donostia Zinemaldiaren artxiboaren katalogoak mekanismo horren lagin oparoa du gordeta: 1987az geroztik, gutxienez, Créteilgo emakumezkoen nazioarteko zinema-jaialdiak bere esku-programak bidali zizkion Donostia Zinemaldiari eta, aldi berean, Estatu mailan emakumeen zinema-ekoizpenari buruzko informazioa eskatzen zion. Truke horren ondorioz, euskal emakumezko zinemagile batek zuzendutako fikziozko film luze batek parte hartu zuen lehen aldiz Frantziako zinema-jaialdi horretan, Ana Díezen Ander eta Yul (1988) filmak, hain zuzen ere. Zabaltegi sailean estreinatu ondoren, bada, Créteilgo zinema-jaialdiaren 11. edizioaren Sail Ofizialean lehiatu zen, eta, gainera, lehen aldiz entzun zen euskara Frantziako hiri horretako pantailetan.

Créteilgo emakumezkoen nazioarteko zinema-jaialdia Jackie Buet irakasleak eta Elisabeth Tréhard orduko Les Gémeaux kultura-ekintzako zentroko zuzendariak sortu zuten 1979an, eta emakumeek zinema-industrian zituzten parte-hartze zifra oso txarrei aurre egiteko jaio zen, programazio feministako espazioak oso urriak ziren nazioarteko testuinguru batean. Beste toki batzuetako ekimenak esploratuz, ikusi zuten 1972an zinema feministako nazioarteko lehen jaialdia egin zela New Yorken eta Women in Film izeneko sindikatu batek zinema-ekoizpena babesten zuela elkarte eta babesletzen bitartez. Une hartan Frantzian egin ziren ekintza bakarrak Musidora elkartearenak ziren: 1974an emakumeek egindako zinemaren lehen topaketa handia egin zuen herrialde horretako Arte Modernoko Museoan. Zinema-kolektibo feminista horretako kideek, gainera, Donostiako Emakumeen Elkarteko kideak aholkatu zituzten emakumeek egindako zinemaren lehen zikloaren programazioan, Donostia Zinemaldiaren barruan. 1978an egin zen, hain zuzen, Créteilgo zinema-jaialdia sortu eta urtebete geroago.

Créteilgo zinema-jaialdiaren 1989ko edizioaren esku-programak jasotzen duen bezala, Ana Díezez eta lehiatu ziren beste batzuez gain (tartean, Ulrike Ottinger, Barbara Trent eta María Novaro), bi foku programatu ziren Delphine Seyrig eta Liliana Cavani omenduta –Lilianak Donostia Zinemaldiaren Zinema Eskolen Nazioarteko II. Jardunaldian parte hartu zuen La Battaglia film laburrarekin 1961ean–, bai eta ziklo bat ere, diasporako zinema hizpide zuena. Imágenes de Mujeres Negras zuen izena, eta Angel Davisek aurkeztu zuen –figura berezia izan zen AEBko eskubide zibilen aldeko mugimenduaren borrokan–.